மழை

நின்றுவிடு மழையே

நீரின்றி அமையாது உலகு சரிதான்
எங்குமே நீராக இருந்தால் 
எப்படி அமையும் உலகு

இயற்கையே 
ஏனிந்தக் கோபம்
எதற்காக இந்த மழைவெறி

புவி வெப்பமானதே
அடைமழைக்குக் காரணம்
சொல்கிறது அறிவியல்

புவி வெப்பமுறச்செய்த
நாங்கள்தான் குற்றவாளிகள்
அதற்காக
இப்படி ஓர் தண்டனையா

அண்ணாந்து பார்த்திருந்தோம்
எப்போது நீ வருவாயென

உண்ண உணவின்றி
உறங்க ஒரு இடமின்றி
அண்ணாந்து பார்த்திருக்கிறோம்
எப்போது நீ நிற்பாயென

இயற்கையே
நாம் ஒரு உடன்பாடு செய்துகொள்வோம்
இனி தீங்கேதும் செய்ய மாட்டோம் உனக்கு
தீங்கொன்றும் செய்யாதே எங்களுக்கு

போதும் மழையே
கெஞ்சிக் கேட்கிறோம்
நின்றுவிடு மழையே