பெயர்

பெரியார் அம்பேத்கார்
மார்க்சு பகத்சிங் பிரபாகரன் போன்ற
சில பெயர்கள்
உச்சரிக்கப்படும்போதே
புரட்சியை விதைத்துவிடுகின்றன

வைத்தவர்களுக்கோ
வைக்கப்பட்டவர்களுக்கோ
அழைப்பவர்களுக்கோ
பொருள் புரியாமலேயே இருக்கின்றன
நிறைய பெயர்கள்

தமிழில் பெயர் வைப்பது
அதிசயமாகவோ 
இல்லையென்றால் 
கேலியாகவோதான் பார்க்கப்படுகிறது
தமிழ்நாட்டில்

பெற்றவர்களின் பெயராலும்
பிள்ளைகளின் பெயராலுமே
அறியப்படுகிறேன் சில நேரங்களில்

பெண்ணின்பெயருக்குப் பின்னால் 
ஒட்டியிருக்கும் ஆணின் பெயர்
எதற்காகவென
இதுவரை தெரியவில்லை

சில நேரங்களில்
பெயரைத் தொலைத்துவிட்டு வாழ
ஆசையாக இருக்கிறது

எங்கே போனாலும் 
கூடவே சுமந்து செல்ல வேண்டியிருக்கிறது
பெயரையும்

சாதி மதம் இனம் எதுவென்பதை
எப்படியோ சொல்லிவிடுகின்றன
பெயர்கள்

சிலருக்கு அடையாளமாகவும்
சிலருக்கு 
வெறும் பெயருக்காகவும் மட்டுமே இருக்கின்றன
பெயர்கள்

திருத்து