குழந்தைகளின் விளையாட்டு

குழந்தைகளையும்
குழந்தைகளாய் 
மாறத்தெரிந்தவர்களையும் மட்டுமே
தங்கள் விளையாட்டில்
சேர்த்துக்கொள்கின்றன குழந்தைகள்

பார்வையாளர்களுக்கு மட்டுமே 
அனுமதி
நடுவர்களையோ 
பயிற்சியாளர்களையோ
விதிகளை வகுப்பவர்களையோ
வல்லுநர்களையோ
வர்ணனையாளர்களையோ 
உள்ளேயே விடுவதில்லை குழந்தைகள்
அதனாலேயே
அவர்களின் விளையாட்டு
ஊழலற்று உண்மையானதாக இருக்கிறது

எந்த விளையாட்டு விதிகளுமே
கட்டுப்படுத்துவதில்லை
குழந்தைகளை
விதிமீறல் இருப்பதாலேயே
ரசிக்கும்படியாக இருக்கிறது
அவர்களின் விளையாட்டு

வெற்றி என்பது இலக்கல்ல
விளையாடிக்கொண்டிருப்பதே இலக்கு
அதனாலேயே
குழந்தைகளின் விளையாட்டு
மகிழ்ச்சியானதாக இருக்கிறது

அவ்வப்போது அழுகை இருக்கும்
குழந்தைகள் விளையாட்டில்
ஆனால்
அழுகுணி ஆட்டம்
ஆடுவதில்லை ஒருபோதும்
மேட்ச் பிக்சிங்கோ
இல்லவே இல்லை எப்போதும்

ஒரு மணி நேரத்தில்
ஒன்பது விளையாட்டுகளை
விளையாடிவிடுகின்றன குழந்தைகள்
ஒன்றைக்கூட நிறைவு செய்யாமல்

எவ்விடத்திலும்
எந்நேரத்திலும்
எப்பொருளை வைத்தும்
பொருளே இல்லாமலும்
விளையாடிவிட முடிகிறது குழந்தைகளால்

திருத்து