மழை

பெய்யெனப் பெய்யாது மழை

பெய்தாலும் திட்டித்தீர்க்கிறோம்
இல்லையென்றாலும் திட்டித்தீர்க்கிறோம்

பெய்யெனப் பெய்யாது
பெய்யும்போதுதான் பெய்யும்

வேண்டும் நேரத்தில் வேண்டுமிடத்தில்
வேண்டுமளவில் பொழிவதற்கு
அது ஒன்றும் வீட்டுக் குழாய்நீரல்ல
இயற்கை அள்ளி இறைக்கும் பெருநீர்

மழை நீரை சேகரிக்க
குளம் கண்மாய் வெட்டிவைத்த
மூதாதையர்கள் முட்டாள்கள்
நாமெல்லாம் புத்திசாலிகள்

சாலையெங்கும்
பெருக்கெடுத்து ஓடும்நீர்
கலந்துவிடுகிறது தெருவோர சாக்கடையோடு
கைகட்டி வேடிக்கை பார்ப்போம்
எப்படியும் மழைக்காலம் முடிந்து
கோடை வந்துவிடும்
எல்லோரும் கையேந்தி பிச்சை கேட்போம்
அண்டை மாநிலத்திடம் தண்ணீருக்காக

வீட்டைச்சுற்றி தேங்கி நிற்கும் தண்ணீர்
ஓடிச்செல்ல வழி இல்லாமல்
வீட்டிற்குள் பாய்கிறது

உயிரையும் உடைமையையும் இழந்து
கலங்கி நிற்கும் உறவுகளைப் பார்க்கும்போது
கண்ணீர்தான் வருகிறது என்ன செய்ய

தன்மீது ஒன்றும் தவறே இல்லை
மனிதர்கள் மீதுதான் தவறு என
மறுபடியும் சொல்லிவிட்டது இயற்கை