மழை

காலையிலேயே வந்தால்
லீவு விடுவார்கள் பள்ளிக்கு
மாலையில் மட்டுமே
வருகிறதென்று
மழை மீது கோபம்
என் மகளுக்கு

கண்மாய் குளத்தையெல்லாம் தூர்த்துக்
கட்டிடங்கள் கட்டிவிட்டு
மழைநீரைச் சேகரிக்கச்சொல்லி
பிரச்சாரம் செய்கிறார்கள்

வியர்வையில் நனைவதற்கு
சம்மதிக்கும் மனது
மழையில் நனைய மட்டும்
ஏனோ மறுக்கிறது

மழைபெய்வது 
எனக்கு மிகவும் பிடிக்கிறது
நான் வீட்டிலிருக்கும்போது

ஏமாற்றத்தோடேயே
ஓடிக்கொண்டிருக்கிறது
வீட்டுவாசலில் மழைநீர்
காகிதக்கப்பல் செய்துவிட
யாருமே இல்லாததால்

என்னை நனைப்பதில்
என்ன ஆனந்தமோ தெரியவில்லை மழைக்கு
குடை எடுத்துச்செல்லும் நாளில்
பெய்வதே இல்லை

மண்ணை மட்டுமல்ல
மனதையும் குளிரவைத்துவிடுகிறது
மழை

திருத்து